ГӘДОУҬА, ԥхынгәы 25– Sputnik, Бадри Есиава. Гәдоуҭа араион аҿы шықәсыбжактәи алашараз аизгақәа 17% артәеит ҳәа иҳәеит аҳәынҭқарра ахада имҩаԥигаз анҭыҵтәи аилатәараҿы "Амшынеиқәафымцамч" Гәдоуҭатәи афилиал аиҳабы Ахра Гагәылиа.
Иара иажәақәа рыла, 2023 шықәса фымз рыҩнуҵҟа 234,1 миллион мааҭ рыхә алашара ахархәара аҭан.
"Абри инамаданы ауал 169,4 миллион мааҭ ыҟоуп. Анаплакқәа рҟынтәи ишәатәны иҟаз 34,2 миллион рҟынтәи ишәоуп 19,2 миллион мааҭ (56,3%). Ауааԥсыра рҟынтәи ишәатәны иҟаз 169,8 миллион рҟынтәи ишәоу 15,4 миллион мааҭ роуп (9,1%). Ауал - 154,4 миллион мааҭ ыҟоуп", - ҳәа иҳәеит Гагәылиа.
Араион аҟны афымцамч ахархәара 15% рыла еиҵахеит, иагьартәеит - 176,4 миллион киловатт-сааҭ.
"Амшынеиқәафымцамч" Гәдоуҭатәи аҟәша 2023 шықәса фымз рыҩнуҵҟа 23 фымцеихшарҭатә станциа маҷ ықәнаргылеит. Иԥсахуп ихәарҭам 21 фымцеихшарҭа, даҽа 8 еиҳа еиҳау амчхара змоу рыла иԥсахуп.
Астанциа маҷ "Приморск" аусура иалагазар ирԥсаххьеит 10 фымцеихшарҭак: 6-киловольтк иҟаз 10-киловольтк иҟоу рыла.
"Уажәазы аиӷьтәраз аусурақәа ирҿуп афидер "Абӷархықә", 1200 метра иҟоу, афидер "Кьараз" - 4 километраки 120 метреи иҟоу, афидер "Жилдом" - 2 километраки 770 метра иҟоу", - ҳәа иҳәеит Гагәылиа.
Иара убасгьы иазгәеиҭеит, Афонҿыц аусура ишалагаз аҭаҩгатә хархәагақәа рықәыргылара. Иахьазы 500 хархәага ықәыргылоуп.
Гагәылиа игәаанагарала, ари аԥарашәараан алҵшәа еиӷьны иаанашьҭуеит. Ахархәагақәа рықәыргылара ашьҭахь аԥареизгара иацлоит 15% инарзынаԥшуа.