АҞӘА, ԥхынгәы 25 - Sputnik. Ашьхахыҵырҭа Пыв аҿы 1942-1943 шықәсқәа рзы ара иҭахаз асовет еибашьцәа рбаҟа аадыртраны иҟоуп нанҳәа 24 азы.
Абри атәы Аԥсны ахада Аслан Бжьаниа изеиҭеиҳәеит Приволжие иҟоу Аԥсны аҳаҭыр консул Владимир Литвинчук.
Литвинчук инапхгаралеи Атәылахьчара аминистрра аррамаҵзурауаа ралахәралеи акультуратә фонд "Платформа" апроект "Кавказтәи афронт" иаҵанакуа абаҟа аиҭашьақәыргылара хдыркәшеит ԥхынгәы азбжазы. Иара Кавказ азы аибашьра 80 шықәса ахыҵра иазкуп.
Атәыла ахада аԥшьгаратә гәыԥ аусура бзиоуп ҳәа ахиҳәааит, ақәҿиарақәа рзеиӷьеишьеит.
2023 шықәса жьҭаара 9 рзы 80 шықәса ҵуеит Аџьынџьтәылатә еибашьра Ду аан реиҳа ишьаарҵәыраз Кавказ азы аибашьра иааирыла еилгеижьҭеи.