ГАГРА, ԥхынгәы 26 – Sputnik, Бадри Есиава. 11 миллион мааҭ инарзынаԥшуа аӡхыҵрақәа аԥхасҭа зырҭаз ауаа ирзыршәеит Гагратәи абизнесуаа ҳәа иҳәеит Гагра араион ахада Иури Хагәышь Аԥсны ахада имҩаԥигаз аилацәажәараҟны.
"Ишыжәдыруа еиԥш Гагра араион аҿы ԥхынгәы 8-9 рзы илеиз ақәаршҩы иахҟьаны 1200 ҩны аӡы рыҵалеит. Ақыҭақәа Лӡаа, Алаҳаӡы, Ԥсахара, Бзыԥҭа аҳабла, Гагра ақалақь ахәҭак аԥхасҭа ӷәӷәа роуит. Иара убри амш азыҵәҟьа иаԥҵан аԥсабаратә рыцҳара ахҟьаԥҟьақәа раԥыхрази ауааԥсыра рыцхраарази аоперативтә штаб, аимадара ҷыда. АҶА аусзуҩцәа уахи-ҽни инеиԥшьны аусурақәа мҩаԥыргон, ԥхынгәы 10 инаркны ааха зауз ақыҭақәа рыҟны атехникеи ауааԥсыреиаус руан", - ҳәа иҳәеит иара.
Хагәышь иазгәеиҭеит ишаԥҵаз аԥхасҭа ахәшьара азҭаша акомиссиагьы. Акомиссиа алахәылацәа ҭӡы-цыԥхьаӡа ирыдҵааланы иҟаз шыҟаз азгәарҭон. Араион ахадараҿы ауааԥсыра рҟынтәи арзаҳалқәа рыдкылара мҩаԥысуан.
Еиҳа аԥхасҭа рыманы аҳәынҭқарра ацхыраара рҭахны ишьоуп 400 ҭаацәара.