АҞӘА, ԥхынгәы 28 - Sputnik, Асмаҭ Ҵәыџьԥҳа. Аԥсны Аиааира 30 шықәса ахыҵра аҳаҭыраз аӡсаразы иаарту ареспубликатә турнир мҩаԥысит Аҟәатәи аӡҭырчы аҟны, ԥхынгәы 28 рзы.
Аицлабрақәа ирылахәын 6 -16 шықәса зхыҵуа 60-ҩык ахәыҷқәа. Рықәреи рԥышәеи иаҵанакуаз ала дара 50, 100, 200 метра зых иақәиҭуи даӷьырӡсеи рыла иӡсон.
"Раԥхьаӡа аӡҭарчы аҟны имҩаԥаҳгоит атурнир, уажәаԥхьа амшын аҟны акәын. Иахьатәи аицлабрақәа ныҳәоуп, избан акәзар аӡҭарчы ҳамоуп", - лҳәеит аспорти аҿари рзы аҳәынҭқарратә еилакы аспорт аҟәша аиҳабы Жанна Занҭариаԥҳа.
Занҭариаԥҳа лажәақәа рыла, атурнир амҽхак дырҭбаарц ргәы иҭоуп.
Атурнир алҵшәақәа макьаназы еилкаам.
Аԥсны Аиааиреи Ахьыԥшымреи риубилеи аҳаҭыраз аӡсаразы атурнир мҩаԥысит Аҟәа
© Sputnik / Томас Тхайцук
Аҟәатәи аолимпиатә ӡҭарчы аартын 1980 шықәсазы, Москватәи аолимпиада аламҭалаз. Аԥсны жәлар Рџьынџьтәылатә еибашьраан ахыбра ааха аиуит, уи аахыс еиҭашьақәыргыламкәа иҟан.
Аҟәатәи аӡҭарчы 2007 шықәсазы ақалақь ахадара қьырала ЗҲәА "Аквастройинвест" ианаҭеит. Уи арҽеира-аиҭашьақәыргыларатә усурақәа ирылагеит. Абри аамҭа иалагӡаны ажәытә комплекс ықәган, адренажтә трубақәа шьҭаҵан, аӡыҭгагақәеи аӡрыцқьагақәеи ргылан, аҽыкәабарҭақәеи, аҽеилаҳәарҭақәеи, атрибунақәеи шьақәыргылан.
Аӡҭырчы аҵаулара – 2,25 метра, аҭбаара – 20 метра, аура – 50 метра иҟоуп. Иара 120-ҩык акуеит.