Аҳәынҭқарра анхарҭатә фонд аҟынтәи аиҳабыра реилазаара иҟанаҵаз ақәҵарала ҩыџьа ҳтәылауаа анхарҭа ахә ашәаразы альготақәа рзаԥҵоуп. Ирыдыркылаз аӡбамҭа инақәыршаны, анхарҭақәа хәыда-ԥсада ирзоужьхоит атәылауаа Ранета Биџевеи, Таифун Кәаӡбеи.
"2021 шықәсазы Аминистрцәа реилазаараҟны ҳара ицәыраҳгеит азҵаара 1992-1993 шықәсқәа раан аибашьраҟны иааны агәымшәара, афырхаҵара аазырԥшыз ҳџьынџьуаа, ара инхо хәыда-ԥсада ироурц азы иахьынхо аҭыԥқәа. Аҳәынҭқарра ахаҵгылара ҟарҵеит. Казбек Биџев 2022 шықәазы хатәгәаԥхарала Луганск дцеит, уа дҭахеит. Иҷкәыни иԥшәмеи Маҷара аҳаблаҿы инхоит. Аҳәара ҟаҳҵеит ҩ-ҿык змоу ауада аҭаацәа ироурц. Ара еибашьыз Иауз Кәаӡба иан лыхьӡала иҟан ауада. 2021 шықәсазы ақәҵа ыҟан аҭаацәа хәыда-ԥсада анхара рыҭара, аха иан лыдунеи лыԥсахит, ашәҟәқәа анотариалла рыԥсахра иахьымӡеит. Уи аминистрцәа еилкааны ахаҵгылара ҟарҵеит", - иҳәеит Ҳаразиа.
Иара еиҭеиҳәеит иахьазы зҭоурыхтә ԥсадгьыл ахь нхара иаауа ҳџьынуаа анхарҭала реиқәыршәаразы лшарас иҟоу атәы.
Аицәажәара инеиҵыхны ишәаҳар шәылшоит аудиофаил аҟны хыхь.