АҞӘА, ԥхынгәы 31 - Sputnik. Украина аруаа гәымшәарыла ижәылоит, аха еиҭаҵра рымам аурыс ир аӷа ԥхьаҟа ицара алмыршараз ӷәӷәала иахьиҿагыло иалҵшәаны ҳәа иҳәеит Урыстәыла атәылахьчара аминистр, ар реинрал Сергеи Шоигу.
"Украина Арбџьармчқәа ҳпозициақәа иааҟәымҵӡакәа рыруаа агәыдырҵоит, аха шьахәрыла еиҿкаау ахьчаратә позициақәа, абџьар ахархәара, апрофессионализми агәаӷьреи аазырԥшуа урыстәылатәи аруаа аӷа дааныркылоит, ԥхьаҟагьы дрышьҭуам", - ҳәа иҳәеит Шоигу УА АМ рнапхгареи иареи имҩаԥыргаз аселектортә еилацәажәараҟны.
Иара иазгәеиҭеит урыстәылатәи аруаа ахырхарҭақәа зегьы рҟны активла аӷа ишиҿагылоу, имчқәа шҵыршәаауа.
Киевтәи арежим рконтржәылара анрықәымҿиа атеррористтә жәыларақәа нап рыларкит, Урыстәыла аграждантә инфраструктура архәашара гәҭакыс иҟаҵаны. Аминистр иажәақәа рыла, убри азы Урыстәылатәи архәҭақәа атеррористтә актқәа ирыдҳәалоу украинатәи арратә хыбрақәа еиҳагьы икылкааны ирыжәырҵо иалагеит.