АҞӘА, нанҳәа 3 – Sputnik. 2023 шықәсазы Аԥсны аӡбарҭақәа рахь инашьҭуп 78 административтә материал авиза рымамзаареи аџьаус азин рымамзаареи рзы. Абри атәы арадио Sputnik иазеиҭеиҳәеит Аԥсны амиграциатә маҵзура аиҳабы ихаҭыԥуаҩ Едуард Гамсаниа.
Иара иажәақәа рыла, Амиграциатә маҵзуреи Аҩнуҵҟатәи аусқәа рминистрреи агәаҭарақәа еицымҩаԥыргоит закәаншьаҭада аус зуа ралкааразы. Гамсаниа иҳәеит Аԥсны аиҳараҩык амигрантцәа ашәҟәы ишҭагалоу, даргьы адокумент рымамзаара ахҟьақәа бзианы ишеилыркаауа.
Гамсаниа иҳәеит, азакәан инақәыршәаны аҳәаанырцәуаҩ Аԥсны дшааилак амиграциатә ҭаҩреи амедицинатә гәаҭареи дшахысуа, аусутә виза шиҭахо, абри ашьҭахь шакәу аусуразы азин аниоуа.
Амиграциатә маҵзура азин амоуп аусура азин ҟанамҵарц, амигрант шықәсык аҩнуҵҟа административтә ҭакԥхықәра идҵазар ма азинхьчаратә усбарҭақәа рҟынтәи иганахь ала ара иҟазаара ахәҭам ҳәа аинформациа ыҟазар. Уи адагьы амигрант дычмазаҩызар, ара иусура ԥкхар ҟалоит.
Аԥсны атәым ҳәынҭқаррақәа ивизадатәу арежим зыбжьоу ртәылауаа ирыҭахоит апотент.
Аҳәаанырцәуаҩ аусура данрыдыркыло аусураҭаҩ иуалԥшьоуп азин алхра, аус зуеи иареи рыбжьара аилаӡара ашьақәыргылара. Иааныркыло аҳәаанырцәуаҩ ахараԥса иқәҵахоит 90-120 000 мааҭ.