Гәдоуҭа араион аҟны ахәыҷбаҳчақәа фба аус руеит, ахәыҷқәа рхыԥхьаӡара 550-ҩык иреиҳауп. Араион аҟны ахәыҷбаҳчақәа рҟны аҭыԥқәа рызхом, 100-ҩык инарзынаԥшуа ахәыҷқәа агәаран иазыԥшуп.
"Иқәгылоуп азҵаара даҽа хәыҷбаҳчак азы, аха макьана акы ҳақәгәыӷыртә аинформациа ҳамаӡам, аҳәынҭқарра иахьазы алшара амаӡам. Убри аҟынтәи ахәыҷбаҳчақәа рҿы агәыԥқәа ацаҳҵартә алшара ахьыҟоу, ҽазнык аиҭарҿыцрақәа ҟаҵаны иацаҳҵарц ауп", - иҳәеит Ҳаразиа.
Убас 1950-тәи ашықәсқәа рзы иргылаз Гәдоуҭа иҟоу ахәыҷбаҳча "Кәыбрыц" ахыбраҟны аиҭашьақәыргыларатә усурақәа мҩаԥган, инацҵаны даҽа 25-ҩык ахәыҷқәа рыдкылара алыршахоит ҳәа азгәеиҭеит Гәдоута араион аҵараҟәша аиҳабы.
Иара иҳәеит ахәыҷбаҳчақәа рахь ицо рыбжьара ишыҟоу азинҷыда иақәшәо, сынтәа урҭ ркатегориа иацлазгьы шыҟоу.
"Сынтәа заҵәык ауп, нас ус иаԥшьаҳгеит ақалақь аҿы аҳәынҭқарратә усбарҭақәа рҟны аус зуа рхәыҷқәагьы убарҭ альготатә категориақәа иалаҳҵарц. Аҳәара ҟарҵоит аусбарҭақәа рхаҭарнакцәа роума, дара аҭаацәа роума, аусура иҭыҵыр ауп, рхәыҷы дызддырбо рымаӡам. Ари проблемоуп, аимак-аиҿакгьы, аилибамкаарагьы ацуп, аха излалшо ала ҳаицхырааны азҵаара аӡбара ҳаҿуп", - иҳәеит Ҳаразиа.
Иара иазгәеиҭеит араион аҟны анаплакҩцәа адгылара шыҟарҵо аҵаратә усҳәарҭақәа рҭагылазаашьа аиӷьтәразы.
Гәдоуҭа араион аҵараҟәша аиҳабы еиҭеиҳәеит, ахәыҷбаҳчақәа ааӡаҩцәа рыла реиқәыршәареи аҳәыҷқәа аԥсышәала рцәажәареи рзы аҭагылазаашьа зеиԥшроу.
Аицәажәара инеиҵыхны ишәаҳар шәылшоит аудиофаил аҟны хыхь.