АҞӘА, нанҳәа 8 - Sputnik. Ашәахьа, нанҳәа 7 рзы Самсон Ҷанба ихьӡ зху Аԥсуа драматә театр аҿаԥхьа имҩаԥган агәалашәаратә акциа "Агәалашәара ацәашьы".
Акциа азкын Қырҭтәыла еибашьрала Аахыҵ Уаԥстәыла ақәлара 15 шықәса ахыҵра. Иара алагеит ақырҭуа архәҭақәа Цхинвал алахысра ианалагаз аамҭа асааҭ 23:30 рзы.
Уи адагьы 2008 шықәсазтәи аибашьра иалаӡыз ргәалашәараз ажәҩан иалаҵан амцаԥшьқәа.
Қырҭтәыла нанҳәа 8 2008 шықәсазы Аахыҵ Уаԥстәыла иақәлеит, жәларбжьаратәи аиқәшаҳаҭрақәа зегьы еилаганы.
Урыстәыла Аахыҵ Уаԥстәыла ауааԥсыра рыхьчаразы ареспублика ар аланагалеит нанҳәа 12 рзы, Қырҭтәыла аҭынчра иазхьанарԥшырц иақәыӷәӷәо. Хәымш рышьҭахь ақырҭуа ар атәыла иалцан. 2008 шықәса нанҳәа 26 рзы Москва Аԥсни Аахыҵ Уаԥстәылеи рсуверенитет азханаҵеит.