АҞӘА, нанҳәа 9 - Sputnik. Шәачантәи Аԥсныҟа атуристтә дәыӷба "Риҵа" аныҟәара иалагоит цәыббра 10 аҽны. Абри атәы радио Sputnik иазеиҭеиҳәеит "Аԥсны аихамҩақәа" рынџьныр хада Леонид Ҟәыруа.
"Риҵа" ныҟәалоит абри амаршрут ала: Шәача - Роза Хутор - Гагра - Аҟәа - Шәача - Аҳаирбаӷәаза, Гагреи Аҟәеи ҽнак-ҽнак игылазаауеит.
"Ааигәа иҳамаз аилацәажәарала Аԥсныҟа аныҟәара иалагоит атуристтә дәыӷба "Риҵа". Раԥхьатәи ареис цәыббра 10 аҽны. Анаҩс ашықәс нҵәаанӡа ԥышәарак аҳасабала аҽа х-реиск мҩаԥнагоит", - иҳәеит иара.
"Аԥсны аихамҩақәа" рынџьныр хада Леонид Ҟәыруа иажәақәа рыла, аихамҩатә транспорт ахархәара амоуп, аиҳарак аԥхынраз.
"Зегьы ибзианы иаадыруеит аԥхын аҳәаа ахысра иамоу апроблемақәа. 4-5 сааҭ ауаа автомҩаҿы игыланы иԥшуп. Адәыӷба ари аҭагылазаашьаҿ аԥыжәара амоуп. Аҳәааҿ 20-20 минуҭ роуп ахысраз аамҭас иаго. Иманшәалоуп. Ауаа џьаргьы иҭыҵӡом, рҭыԥқәа рҿы итәоуп",- иҳәеит анџьныр.
Аԥсныҟа иныҟәоит атуристтә дәыӷба "Тҟәаԥс-Гагра". Аҟәантәи адәыӷбақәа цоит Москваҟа, Санкт-Петербургҟа, иара убас Урыстәыла ақалақьқәа жәпакы рахь.