АҞӘА, нанҳәа 9 – Sputnik, Бадраҟ Аҩӡба. Аԥснытәи арҵаҩцәа Санкт-Петербург рзанааҭтә ҩаӡара шеиздырҳауа еиҭарҳәеит.
"Апрограмма зегь еихшаны иҟаҵоуп, алекциақәа мҩаԥысуеит. Иалкаара ҳҭахуп аурыс бызшәеи алитературеи рырҵаҩы Константин Валери-иԥа Вылегжанин, иара ишәҟәи ицхыраагӡақәеи ирыбзоураны аурок аинтерес аҵа ацны имҩаԥысуеит", - еиҭалҳәоит Аԥснытәи акурсқәа рлахәыла Џьамила Ҭорҭиа.
Лара илҳәоит урыстәылатәи алекторцәа ирҿуҵааша шырацәоу. Илхамшҭуа илзынхеит лгәаҿы Санкт-Петербург автобуслеи шьапылеи ианыддырбоз.
"Россотрудничества абасеиԥш аурыс бызшәеи алитературеи рырҵаҩцәа рҟазара аизырҳараз акурсқәа ҳрылахәхартә аиԥш аҭагылазаашьа ахьҳанаҭаз ҭабуп ҳәа ҳҳәоит" - лҳәеит лара.
Нино Елиава иазгәалҭеит арҵаҩцәа еиҳа аурыс грамматикеи афонетикеи ртема уадаҩқәа рызнагашьа шырҵо.
"Акурсқәа рышьҭахь асертификатқәа ҳаҭахоит. Иҭабуп ҳәа расҳәоит Россотрудничество, Аԥсны аҵара аминистрра. Акурсқәа рҟны апрактикатә материал ду ҳаҭан. Арҵаратә методика даара ибзиан. Ишсылшо ала сҵаҩцәа рҟны схы иасырхәоит", - лҳәеит Елиава.
Аҟазара азырҳараз акурсқәа ирылахәын 85 рҵаҩы: Аԥсны, Аргентина, Ермантәыла, Беларусиа, Қырҭтәыла, Индиа, Ҟазахстан, Киргизиа, Китаи, Молдавиа, Монголиа, Таџьикистан, Тунис, Узбекисҭан, Аахыҵ Уаԥстәыла рҟынтәи. Акурсқәа мҩаԥысуеит нанҳәа 19 рҟынӡа.