АҞӘА, нанҳәа 17 - Sputnik. Аԥснытәи аҳазалхыҩцәа закәаншьаҭада ииаргоз 600 ҭоԥ асигарет рбеит ҳәа аанацҳауеит Аҳазалхратә еилакы апресс-маҵзура.
Урыстәыла атәылауаҩ 600 ҭоԥ асигарет Аԥснынтәи аиагара иҽазишәеит. Аҳазалхырҭатә ҭыԥ "Ԥсоу" аҿы имашьына гәаҭан.
Аидараҭаҵарҭа аҟәшаҿы ирбеит ашәҟәы иҭагаламыз атауар, иагьимырхит.
Уаанӡа Краснодартәи аҳазалхырҭа адырра ҟанаҵахьан 2023 шықәса ажьырныҳәа инаркны рашәарамзанӡа закәаншьаҭада аҭаҭын аалыҵ аҳәаа ахыгаразы 462 ус шхацырку, 40 000 ҭоԥ асигарет (5 миллион мааҭ рыхә) шрымху азы.