АҞӘА, нанҳәа 18 – Sputnik. Аинтернационалтә бригада "Пятнашка" 1-тәи абаталион акомандаҟаҵаҩ Алиас Аҩӡба Урыстәыла аҵара аминистр Сергеи Кравцов иабжьгаҩыс дҟалеит азеиԥш лагамҭала. Абри атәы аанацҳауеит аусбарҭа апресс-маҵзура.
Аминистри иареи реиԥылараан ирылацәажәан еиҵагыло аҿар рырра-патриоттә ааӡара азҵаарақәа.
Аганқәа алацәажәеит амаҭәар ҿыц "Аԥсадгьыл ашәарҭадареи ахьчареи рышьаҭақәа", ашколхәыҷқәеи арратә операциа ҷыда афырхацәеи реиԥыларақәа, атематикатә цәыргақәҵақәа ашколтә музеиқәа рҟны рымҩаԥгара, иара убасгьы аҭоурых азы арҵагақәа рҟны иалагалазарц– арратә операциа алагалара зыхҟьази, ДЖәР, ЛЖәР, Запорожие Херсонтәи аобластқәа Урыстәыла ралалара шыҟалази еиҭазҳәо аҟәша ҿыц.