АҞӘА, нанҳәа 19 – Sputnik. Аԥсны абылтәы ахә ашьҭыҵра урыстәылатәи аџьармыкьаҟны иҟоу аҭагылазаашьа анырра анаҭоит, абри азы аҳәамҭа ҟанаҵеит Аԥсны аекономика аминистрра.
"Раԥхьаӡа иргыланы- аҭаххаразы абаланси иҟоу адгалареи, анефти адоллари рыхә, анефт аус адызуло азауадқәа иазгәаҭоу рремонт, ашәахтәшәарақәа, аԥхынтәи аамҭа, абарҭқәа зегьы абылтәы ахә анырра анаҭоит", - азгәаҭоуп адырраҭараҿы.
Аԥсны аекономика аминистрра ишазгәарҭаз ала, урыстәылатәи аџьармыкьаҟны абылтәы ахә иацлеит, жәабран-хәажәкыра рзы АИ-92 литрк 33,50-35 мааҭ иаԥсазҭгьы, аԥхынразы абылтәы ахә 51-52 мааҭ рҟынӡа ихалеит.
Уи инамаданы Аԥсныгьы абылтәы ахә иацлеит, АИ-92 литрк жәабранмзазы 40 мааҭ иаԥсазҭгьы, иахьа 55-59 мааҭ иаԥсоуп.
Аԥсны абылтәи анефтаалыҵи рыхә урыстәылатәи аџьармыкьа иаҿырԥшны ишьақәдыргылоит, иара убас анырра анаҭоит ашәахтәшәарақәа, аҳазалхратә шәарақәа, амаҵзуразы асертификациа, аагареи аҵәахреи. Уи адагьы, анаплакҩцәа абылтәы анырҭилакгьы ахашәалахәытә шәахтә ршәоит.