АҞӘА, нанҳәа 21 - Sputnik. Аԥсадгьыл ахь ахынҳәраз Аилак аидеологиатә усура мҩаԥнагоит, арепатриантцәа аҭыԥ ҿыц раршьцылараҿ ирыцхраауеит иҳәеит арадио Sputnik аинтервиу азҭаз Аилак ахантәаҩы ихаҭыԥуаҩ Асҭамыр Багаҭелиа.
Аидеологиатә усура аҳәаақәа ирҭагӡаны аус руеит апрограммақәа: аԥхынтәи алагер, аԥсуа бызшәа арҵара, амобилтә цҵақәа разырхиара, астуденттә программақәа ҳәа иҳәоит иара.
"Абыржәтәи аамҭазы аԥхынтәи алагер мҩаԥысуеит, 12-15 шықәса зхыҵуа ахәыҷқәа алоуп. Иара хықәкыс иамоуп ҳџьынџьуаа адунеи атәылақәа рҟны инхо аԥсуа культуреи атрадициақәеи дырбара", - иҳәеит Багаҭелиа.
Аилак ахырхарҭа хадақәа иреиуоуп Аԥсныҟа ихынҳәыз нхарҭа ҭыԥла реиқәыршәара. Ашықәс нҵәаанӡа ахархәарахь ирыҭахоит ауадарацәа змоу аҩнқәа ҩба. Уи иазоужьуп 80 миллион мааҭ. 250 репатриант агәаран иқәгылоуп. Аидеологиатә усура амҩаԥгаразы 2023 шықәсазы 22 миллион мааҭ азоужьын.
"Арҭ аԥарақәа аԥхынтәи алагер, аматериалтә цхыраара, ахәшәқәа раахәара, ахәыҷы иира (актәи изы – 30 000 мааҭ, аҩбатәи изы – 40 000 мааҭ, ахԥатәи изы – 50 000 мааҭ) ирзырхоуп", - иҳәеит иара.
Абиуџьет ахәҭак аԥсшәеи аурысшәеи дырҵаразы акурсқәа реиҿкаара иазырхоуп. Аус ауеит аҳәаанырцә инхо рзы аԥсуа бызшәазы аонлаин-курсқәа. Ари акраҵанакуеит, избанзар зыԥсадгьыл ахь ихынҳәуа рҭагылазаашьа арманшәалоит, аусура аԥшаареи аҵараҵареи иаҳа ирзымариахоит.
Астудентцәа рзы апрограммала арепатриантцәа Аԥснытәи аҳәынҭқарратә университет аҿы аҵара рҵоит иҳәеит Багаҭелиа.
2019 шықәсазы Аԥсны ашәҟәы иҭагалан 420 репатриант, 2020 шықәсазы – 270, 2021 шықәсазы – 230, 2022 шықәсазы – 217, сынтәазы – 103-ҩык.