АҞӘА, нанҳәа 22 - Sputnik. 2023 шықәса иалагазар Аԥсны иаарԥшуп ҩеижәи жәеизаҩык маӡала аус зуаз агидцәа ҳәа рҳәеит Атуризм аминистрраҿы.
Дара зегьы урыстәылаа роуп ҳәа азгәарҭеит аусбарҭаҟны.
Гагра араион аҿы аҵыхәтәантәи агәаҭарақәа мҩаԥган нанҳәа 21 рзы. Иара напхгара аиҭон атуризм аминистр Ҭеимураз Хышба. Иаарԥшын ҩыџьа "анелегалцәа", урҭ азинеилагараз ашәҟәқәа рзылҩаан.
Аԥсны зынӡа ашәҟәы иҭагалоуп 500-ҩык аекскурсиамҩаԥгаҩцәа. Дара аминистрраҿы аҽазыҟаҵарақәеи аттестациеи ирхысуеит. Азин ҷыда зҭоу агид иоуп Аԥсны аҵакыраҿы аусура азин змоу.
Аха уи Урыстәылеиԥш Аԥсны иатәугьы ааннакылом. Асеиԥш иҟоу аекскурсиамҩаԥгаҩцәа аиҳарак Аԥсны аҭоурых атуристцәа ианырзеиҭарҳәо акыр еицаркуеит.
Атуризм аминистрра, Аԥсны аекскурсиамҩаԥгаҩцәа Рассоциациа, АҩАР, ОБЕП, ААИ русзуҩцәа алархәны аамҭа-аамҭала агәаҭарақәа мҩаԥыргоит маӡалатәи аекскурсиамҩаԥгаҩцәа рышьақәыргыларазы.