Тҟәарчал араион аҿы иҟоуп 17 школ, ахәыҷбаҳчақәа хԥа, аспорт школк ҳәа адырра ҟаиҵеит Ферзба. Иара иажәақәа рыла, аԥхын классқәак рҿы арҽеиратә усурақәа мҩаԥган аҭаацәа рымчала, аха иҟаҵатәу маҷым.
"Агәыбедиа ашкол ҳаԥхьаҟа 100 шықәса ахыҵуеит. Иара аҭоурых ду амоуп. Ашкол аҿы аиҭашьақәыргыларатә усурақәа рзы атәыла анапхгараҟынтә 3 миллион мааҭ азоужьуп, еиҭа ақыҭа иалҵыз Џьумбер Ҭҟьебучаа х-миллион мааҭк аиҭеит, ашықәс ҿыцынӡа аиҭашьақәыргыларатә усурақәа мҩаԥгахоит", - иҳәеит Ферзба.
Араион аҿы иааидкыланы 350-ҩык арҵаҩцәа ыҟоуп, ақалақьтә школқәа акадрқәа рыла еиқәшәазар, араионтә школқәа рҿы ауадаҩрақәа ыҟоуп.
"Аҵараиурҭақәа роушьҭымҭацәа ашколқәа рахь аусуразы ахынҳәра иалагеит, уи ала апроблема ҳаӡбап ҳәа сгәы иаанагоит", - ҳәа азгәеиҭеит Ферзба.
Инарҭбааны аиҿцәажәара шәазыӡырҩыр шәылшоит арадио Sputnik Аԥсны аефир аҿы мамзаргьы аудиофаил аҿы.