АҞӘА, нанҳәа 26 - Sputnik, Сариа Кәарцхьиаԥҳа. Иԥсҭазаара далҵит Аԥсны Афырхаҵа, аԥырҩы Виачеслав Ешба. Абри атәы Sputnik акорреспондент изеиҭеиҳәеит уи иҩыза гәакьа, Леон иорден занашьоу Закан Нанба.
Виачеслав Ешба анышә дамардоит иқыҭа гәакьа Дәрыԥшь ашәахьа, нанҳәа 28 рзы.
Виачеслав Аҳмеҭ–иԥа Ешба диит 1949 шықәсазы. 1970 шықәсазы далгеит Москватәи аобласт аҿы иҟоу Егориевсктәи авиациа-техникатә ҵараиурҭа, 1973 шықәсазы - Кременчугтәи аԥырратә ҵараиурҭа,1983 шықәсазы аграждантә авиациазы Ленинградтәи академиа. "Аҳауатә транспорт арныҟәцаразы анџьныри, "атранспорттә авиациазы актәи акласс змоу аԥырҩи" азаанаҭқәа иоуит. Аус иуан аграждантә ҳаирпланқәа рҟны аԥырҩыс, Аҟәатәи аԥырҩцәа ргәыԥ адҵаҟаҵаҩс дыҟан.
Аԥсны Аџьынџьтәылатә еибашьраан иара инапхгарала еиҿкаан арра-ҳаиртә мчқәа. Аибашьраан Виачеслав Ешба 80 инарзынаԥшуа аԥыррақәа наигӡеит. Иааирԥшыз алшамҭақәа рзы ихҵан Аԥсны Афырхаҵа ҳәа ахьӡ ҳаракы.
1993-2003 шықәсқәа рзы Виачеслав Ешба Аԥсны Арра-ҳаиртә мчқәа рыдҵаҟаҵаҩс дыҟан, 2003-2005 шықәсқәа рзы - Атәылахьчара аминистрс.
Ианашьан асоветтә орден "Аџьазы Ахьӡ-Аԥша" III аҩаӡара, Аԥсни Ихьыԥшым амилаҭқәа реидгылеи рорденқәеи рмедалқәа жәпакы, Авиациаҿи акосмонавтикаҿи ауаҩы ипроблемақәа жәларбжьаратәи ракадемиа ҳаҭыр зқәу алахәылас дыҟан. Аинрал-маиор ԥхьатәа. Иара ихьӡ ануп "Авиациа ахаҿқәа ренциклопедиа".