АҞӘА, нанҳәа 29 - Sputnik. Ҩыџьа ауаа ҭахеит Аҟәа иҟалаз аԥжәара иахҟьаны, абри атәы аанацҳауеит Аԥсны АҶА апресс-маҵзура.
Заанаҵтәи адыррақәа рыла, аԥжәара ҟалеит Жданов имҩаҟны игылоу ахатәыҩны аҟны. Ҩыџьа ҭахеит, аӡәы ахәшәтәырҭахь днагоуп.
Аԥжәара ҟалеит ҳәа АҶА ахь адырра ҟалеит 11:40 сааҭ рзы. Аҭыԥахь инеит апиротехникатә ҟәша аусзуҩцәа, АҶА амедусзуҩцәа, аиқәырхаҩцәа, амцарцәаҩцәа. Иара убас ахҭыс ахьыҟалаз днеит аусбарҭа ахада, аинрал-леитенант Лев Кәыҵниа", - аҳәоит адырраҭараҟны.
Иҟалаз шыҟалаз еилкаам, аусҭҵаара мҩаԥысуеит.