АҞӘА, нанҳәа 31 – Sputnik. Цәыббра аказы Очамчыра араион Аракьыҽытәи ашкол актәи акласс ахь хҩык аҵаҩцәа неиуеит ҳәа арадио Sputnik иазеиҭалҳәеит ашкол адиректор Гехануш Кансузиан.
Сынтәа ара 80-ҩык рҟынӡа аҵара рҵалоит, азыҟаҵаратә класс ахь инеиуеит фҩык, актәи акласс ахь – хҩык лҳәеит Кансузиан.
Аремонт ашьҭахь ахыбра ссируп, арҵаҩратә коллектив аусура иазыхиоуп лҳәеит ашкол адиректор.
"Аклассқәа хиоуп, аҩнымаҭәа аахәоуп. Уаҵәы, асааҭ 9 рзы аҵаҩцәа арахь ршьаҿа еихыргоит. Ари ныҳәоуп аҭаацәа, арҵаҩцәа, ахәыҷқәа рзы. Иахьа асасцәа дуқәа ҳҭан – атәыла ахада, аҵара аминистр, адепутатцәа, араионтә ҵара аҟәша аиҳабы, Аԥсны ашколқәа рдиректорцәа", - лҳәеит Кансузиан.
Гехануш Кансузиан иазгәалҭеит ашкол ҟамлар ақыҭагь шыҟамло.
2023 шықәса хәажәкырамзазы Аркьыҽы ақыҭан ашкол блит. 76-ҩык аҵаҩцәа аднакылеит Аҭаратәи ашкол.