АҞӘА, цәыббра 7 - Sputnik. Аԥсны аԥыза-министр Александр Анқәаб Ихьыԥшым аҳәынҭқаррақәа реимабзиара (ИАР) аусқәа рзы Аҳәынҭқарратә Дума Аилак ахантәаҩы актәи ихаҭыԥуаҩ Константин Затулин 65 шықәса ихыҵра идиныҳәалеит. Абри атәы аанацҳауеит Аиҳабыра реилазаара апресс-маҵзура.
Александр Анқәаб Затулин изеиӷьеишьеит агәабзиара, насыԥ зцу ашықәснҵыра ду, иполитикатә усураҿы аихьӡарақәа.
Константин Затулин - урыстәылатәи аполитик, Аҳәынҭдума адепутат, Ихьыԥшым аҳәынҭқаррақәа реимабзиареи (ИАР) евразиатәи аинтеграциеи аицтәылауаа реимадареи аусқәа рзы Аҳәынҭқарратә Дума Аилак ахантәаҩы актәи ихаҭыԥуаҩ.
Аԥсуа жәлар рзинқәа рыхьчареи Аԥсни Урыстәылеи реиҩызара арӷәӷәареи аҟны илшамҭақәа рзы Затулин 2008 шықәсазы атәыла ахада Сергеи Багаԥшь иусԥҟала ихҵан Аԥсны ҳаҭыр зқәу атәылауаҩ ҳәа ахьӡ ҳаракы. Затулин ианашьоуп "Ахьӡ-Аԥша" аорден II аҩаӡара.