АҞӘА, цәыббра 8 - Sputnik. Приднестровие иҟоу Аԥсны азинмч змоу ахаҭарнак Александр Ватаман диԥылеит Приднестровиатәи Молдавиатәи Ареспублика адәныҟатәи аусқәа рминистр Витали Игнатев. Абри атәы аанацҳауеит аусбарҭа апресс-маҵзура.
Аиԥылараҟны Игнатев иазгәеиҭеит, апандемиа COVID-19 уҳәа реиԥш ауадаҩрақәа шыҟазгьы, Аԥсни Приднестровие реизыҟазаашьақәа ҭышәынтәаланы ишыҟоу.
Аминистр иҳәеит, аҩ-республикак рнапхгара иҟарҵо аҽазышәарақәа реизыҟазаашьақәа апрактикатә импульс шрырҭо.
Аиԥылараҟны аганқәа алацәажәеит аполитикатәи агуманитартәи аусхкқәа рҟны русеицура, аԥсуа-приднестровиатәи еицырзеиԥшу апроектқәа аус рыдулара.