АҞӘА, цәыббра 10- Sputnik. Атуристтә дәыӷба "Риҵа" Аԥсныҟа иааит, абри атәы аанацҳауеит Аԥсны аихамҩақәа.
Адәыӷба Гаграҟа иааит цәыббра 10 ауха. Иахьа апассаџьырцәа аӡиа Риҵа иаҭаауеит.
Уаҵәы ашьыжь адәыӷба дәықәлоит Афон ҿыцҟа, уаҟа атуристцәа Афонҿыцтәи аҳаԥи егьырҭ аҭыԥ ԥшӡарақәа ирҭаауеит. Анаҩстәи ҩымш Аҟәа иҟазаауеит.
Атурпакет шьақәгылоуп- Черповца аҟынтәи Шәачанӡа ҳаирпланла аара, адәыӷбала аныҟәара абри амаршрут ала- Шәача - Роза Хутор - Гагра - Аҟәа - Шәача - шәачатәи аҳаирбаӷәаза, иара убас аекскурсиатә программа.
Атуристтә дәыӷба "Риҵа" Аԥсныҟа иааит
© Foto / РУП "Абхазская железная дорога"
Атур ахә иагәылоуп- аҳаирплан, адәыӷбала аныҟәареи аекскурсиатә программеи рыхә, уахь иаҵанакуеит атранспорти аҭыԥ ԥшӡарақәа рҭааразы абилеҭқәа рыхәи.