АҞӘА, цәыббра 13 - Sputnik, Бадраҟ Аҩӡба. ConIFA аверсиала ашьапылампыл азы адунеи ачемпионат иалахәхоит Аԥсны еизгоу акоманда ҳәа Sputnik иазеиҭеиҳәеит Аԥсны ашьапылампыл Афедерациа ахада Шабаҭ Логәуа.
Иара иажәақәа рыла, ачемпионат иалахәхо реилкааразы иазыӡбан аилыԥшааратә еиндаҭлара амҩаԥгара. Аҵәҭаԥсара аихшьаалақәа рыла Аԥснытәи еизгоу акоманда ацхәмарраны иҟан Арцахи Аахыҵ Уаԥстәылеи ркомандақәа.
Аахыҵ Уаԥстәыла аилыԥшааратә еиндаҭлара аҟынтәи ахы иақәиҭтәаны иаразнак Адунеи ачемпионатахь инашьҭуп, Аԥсни Арцахи ԥхынгәымзазы еицыхәмарран иҟан, аха ахәмарра мҩаԥымсӡеит.
"Аԥсни Арцахи реицлабра мҩаԥысран иҟан ԥхынгәы 10 рзы, аха акоманда Аԥсныҟа иаартә еиԥш агуманитартә мҩа рмоуӡеит", - иҳәеит Логәуа.
Уи иахҟьаны ахәмарра зымҩаԥымсӡеит, аицлабра аиҿкааҩцәа рыӡбамҭала Аԥснытәи акоманда адунеи ачемпионат иалахәхоит.
Иааизакны адунеи ачемпионат иалахәхоит 16 команда.