АҞӘА, цәыббра 15 – Sputnik. Аԥсны Адәныҟатәи аусқәа рминистр Инал Арӡынбеи Аҟәа араион активи реиԥылара ашьҭахь, асоциалтә ҳақәа рҟны аминистр иажәақәа реицакразы аҽазышәарақәа ҟаҵан, ус еиԥш ахымҩаԥгашьа ауаажәларра рҿы аибарххара цәырнагар алшоит. Абри атәы аҳәоит аминистрра апресс-маҵзура.
"Аминистр иқәгылара ззырхаз атәылаз алахьынҵатә ҵакы змоу азҵаарақәа ныҭкааны рылацәажәара акәын", - азгәаҭоуп адырраҭараҿы.
Адәныҟаполитикатә усбарҭа ишаанацҳауала, Инал Арӡынба араионқәа рҟны иқәгыларақәа раан дырзааҭгылоит агеополитикатә ҭагылазаашьа, иара убас Урыстәылеи Қарҭи реизыҟазаашьақәа аҽшеиҭанакызи.
Инал Арӡынба инаҵшьны иазгәеиҭеит Аԥсны Аҳәынҭқарра ахьыԥшымра арӷәӷәаразы ишхымԥадатәиу ауаажәларра-политикатә мчрақәа реидгылара.