АҞӘА, цәыббра 17 - Sputnik. Зқьи хәышәҩык рҟынӡа алахәхоит Аԥсны Аиааира 30 шықәса ахыҵразы апарад, абри атәы ТАСС иазеиҭеиҳәеит атәылахьчара аминистр ихаҭыԥуаҩ, аинрал-полковник Беслан Ҵәыџьба.
Ҵәыџьба иажәақәа рыла, апарад иалахәхоит атәылахьчара иатәу архәҭақәа зегьы, амчратә усбарҭақәа рҟынтәи аколоннақәа - АШәМ, амиграциатә маҵзура, аҳазалхратә еилакы, АҶА, Аҳәынҭқарратә ахьчаратә маҵзура.
"Аԥсны АҩАР раԥхьаӡакәны иқәнаргылоит ҩ-колоннак - амаҵзура ҷыда аибашьцәеи амилициа ҵараиурҭа акурсантцәеи. Иара убас апарад иалахәхоит Аԥсны иҟоу урыстәылатәи 7-тәи арратә база, Афедералтә шәарҭадаратә маҵзура Аҳәаахьчаратә усбарҭа, аказакцәа", - иҳәеит Ҵәыџьба.
Апарад аҽазыҟаҵара хада мҩаԥгахоит цәыббра 28 рзы.
1993 шықәса цәыббра 30 рзы ихыркәшахеит Аԥсны жәлар Рџьынџьтәылатә еибашьра. Аԥсуа еибашьцәа ҳбираҟ шьҭырхит Егры аӡиас ала ицо Аԥсны аҳәааҿы.