АҞӘА, цәыббра 18 – Sputnik. Амилициа дааныркылеит абахҭаҟынтә ибналаз Иашҭхәа ақыҭа анхаҩы Гурген Киракосиан ҳәа аанацҳауеит Аԥсны аҩнуҵҟатәи аусқәа рминистрра апресс-маҵзура.
Ашьаусԥшаара аусзуҩцәа Киракосиан дааныркылеит Каман ақыҭан ашьыжь, цәыббра 18 рзы.
2023 шықәса жәабранмзазы Гурген Киракосиан 15 шықәса аҭакреи 25 нызқь мааҭ ахараԥса ашәареи иқәырҵеит Едуард Қьецба ишьразы. Едуард Қьецбеи иареи Каман арыжәтә џьбара еицыржәуан. Уи аамҭазы дара рыбжьара аимак-аиҿак ҟалеит, Киракосиан игәы ԥжәан, гәҭакыла Қьецба автомат Калашников ала диеихсны дишьит. Едуард Қьецба иаразнак иԥсҭазаара далҵит, Киракосиан иҿиӡеит, аха ԥыҭрак ашьҭахь даанкылан.
Уи адагьы, 2020 шықәсазы абџьари аџьаԥҳани закәаншьаҭада рымазаара ихарарҵон, уи аамҭазы Ареспубликатә хәышәтәырҭа дҭан, уантәи иара абналара илшеит: инапқәа злаҿаҳәаз ԥыртны, ашьаршьафқәа еидҿаҳәаланы ахԥатәи аихагыла аԥенџьыр аҟынтәи дылбааны дыбналеит. Анаҩсан, Гурген Киракосиан азинхьчаратә усбарҭақәа иҽриҭеит.
Ҳазҭоу ашықәс нанҳәамза 13 рзы Киракосиан Дранда абахҭаҟынтәи дыбналеит.