АҞӘА, цәыббра 26 - Sputnik. Аиааира амш иазкыз аҽырхәмаррақәа мҩаԥысит Мықә ахаша, цәыббра 26 рзы.
Аусмҩаԥгатә иалахәын Аԥсны ахада Аслан Бжьаниа, уи ихаҭыԥуаҩ Бадра Гәынба, Очамчыра араион ахада Беслан Бигәаа.
Апрограммаҟны иҟан аҵәеигәыдҵа, ҽыла ампыласра, аҽырхәмарра, ҽыла апарад ақәсра, ҽыла аиԥхныҩлара.
Аԥсны раԥхьатәи ахада Владислав Арӡынба игәалашәараз 1400 метра абжьаӡараҟны аԥхьахә ҭыԥ ааникылеит Дмитри Қардиа, аҩбатәи - Руслан Дочиа, ахԥатәи Инал Гәаланӡиа.
Аԥсны Аџьынџьтәылатә еибашьраҟны иҭахаз рыхьӡала 1000 метра аиԥхныҩлараҿ актәи аҭыԥ ааникылеит Кьасоу Занҭариа, аҩбатәи Саид Кархалаа, ахԥатәи Леон Кархалаа.
Аԥсны ахада Аслан Бжьаниа ихьӡала 2000 метра аҽыҩқәа реиԥхныҩлараҿ аиааира игеит Дмитри Қардиа.
Аԥсны аҩбатәи ахада Сергеи Багаԥшь игәалашәараз 2400 метра аиԥхныҩлараҿ аиааира игеит Инал Гәаланӡиа.
Аҽырхәмарраҿ актәи аҭыԥ ааникылеит Владимир Логәуа (Ҷлоу), аҩбатәи - Беслан Бжьаниа (Тамшь), ахԥатәи - Хьрыԥс Табагәуа (Кәтол).
Аҵәеигәыдҵеи ҽыла ампыласреи реихшьаалақәа макьана еилкаам, ажәабжь иацҵахоит.