АҞӘА, цәыббра 28 – Sputnik, Асмаҭ Ҵәыџьԥҳа. Жәлар реизара адепутатцәа Аԥсны Аиааиреи Ахьыԥшымреи 30 шықәса ахыҵра ахьӡала иазгәаҭоу азаҭ азы ақәҵара ариашара алагаланы ирыдыркылеит аҩбатәи, аҵыхәтәантәи аԥхьарала. Ақәҵара рыдигалеит адепутат Дауҭ Хәытаба.
"Ариашара акыр иазааигәоуп адепутат Кан Валери-иԥа Кәарҷиа уаанӡатәи иажәалагала, аха сара иацысҵеит азаҭ иаҵанамкша ахәҭаҷқәа рхыԥхьаӡара. Арахь иаҵанакуеит гәҭакрылатәи ауаҩшьра, ауаа рымҵарсра", - иҳәеит Хәытаба, иагьациҵеит арахь ишаҵанакуа ахацәеи-аҳәсеи иҟарҵаз ацәгьоурақәеи аԥсадгьыл аԥсахреи.
Ариашарақәа инарықәыршәаны рықәҵа аҿҳәара иахьмырԥшыкәа рхы иақәиҭыртәуеит аибашьра аветеранцәа (ауаҩшьра, ауаҩымҵарсра, асексуалтә ҟазшьа змоу ацәгьоурақәа, аԥсадгьыл аԥсахра, аҳәаанырцәтәи аԥшыхәырҭақәа рмаҵзура ирылахәу ахаҿқәа аалхны).
Иара убасгьы рхы иақәиҭтәхоит 55 шықәса ирҭысыз аҳәса, 60 шықәса ирҭысыз ахацәа.
Ақәҵара амчра аиуеит официалла ианыркьыԥхь амш инаркны, анагӡара аҿҳәара – ҩымз.