АҞӘА, жьҭаара 1- Sputnik. Аҟәатәи агәашьаркыра аҩызацәҟьа Башкортосҭан аҳҭнықалақь Уфа иалсуа аӡиа ахықәан иргылахоит. Абри атәы иҳәеит Башкортосҭан ахада Ради Хабиров ихатәы Telegram-канал аҟны.
Башкириатәи аделегациа ҳтәыла иаҭааит 1992-1993 шықәсқәа рызтәи Аԥсны Аџьынџьтәылатә еибашьра аҟны игаз Аиааира 30 шықәса ахыҵра аԥсуа жәлар ирыдырныҳәаларц. Хабиров иазгәеиҭеит ари акыр зҵазкуа рыцхәны ишыҟоу, иуадаҩыз аибашьра аамҭақәа рзы Башкортосҭан аԥсуа жәлар агуманитартә цхыраара шырзыҟанаҵоз, башкириатәи аҳақьымцәа аԥсуаа ирывагыланы аус шыруаз.
"Аԥсны ахадеи сареи ҳаицәажәеит, аԥсуааи абашкирцәеи реиҩызара зырҵабыргуа, Аҟәа игылоу агәашьеибаркыра аҩызацәҟьа Уфа аӡиас Белыи аԥшаҳәаҿы иҳаргыларц", - иҳәеит иара.
Хабиров иазгәеиҭеит, Ареспублика Башкортосҭан амш аназгәарҭо жьҭаара 11 рзы ари архитектуратә ргыларазы раԥхьатәи ахаҳә шышьҭаҵахо, иааиуа ашықәс азы ҩ-жәларык реиҩызара иазку агәашьеибаркыра аԥшаҳәа шарԥшӡо.
"Ареспублика амш жьҭаара 11 рзы ахаҳә шьҭаҳҵоит, иааиуа ашықәс азы абри аҩыза агәашьеибаркыра ҳаргылоит, ҳажәларқәа реиҩызара ахьӡала, иазгәасҭоит ианыуадаҩ аамҭаз ажәларқәа еицхыраауазароуп", -иҳәеит Хабиров.