АҞӘА, жьҭаара 2- Sputnik. Аԥсуа қәԥаҩы Инал Берзениа Китаи имҩаԥысуа XIX Азиатәи ахәмаррақәа дрылахәхоит, абри атәы аанацҳауеит аҿари аспорти русқәа рзы Аҳәынҭеилакы.
Берзениа дықәгылоит 86 кьыла зыкапан ыҟоу рыбжьара Шьамтәылатәи абираҟ даҵагыланы. Аицлабра мҩаԥысуеит жьҭаара 4-7 рзы.
Инал Берзениа - азыҟаҵаҩ Ҭемыр Џьопуа диааӡамҭоуп. 2023 шықәса ԥхынгәымзазы Алжир зых иақәиҭу ақәԥарааз аицлабрақәа рыҟны аиааира игеит.
Азиатәи ахәмаррақәа - ари Азиа Аолимпиатә хеилак иалоу 45 ҳәынҭқарра рҟынтәи аспортсменцәа злахәу аспорт маҷ еицлабрақәоуп. Цәыббра 23 рзы излагаз аицлабрақәа хыркәшахоит жьҭаара 8 рзы.