АҞӘА, жьҭаара 4 - Sputnik. 2023 шықәса иалагазар ахатәхаҿқәа ЕАЕС аҵакырахь атранспорт алагалараан аҳазатә шәарақәа ахьырымшәоз азы Урыстәыла ашьаусқәа хԥа хацдыркхьеит, абри атәы аанацҳауеит Краснодартәи аҳазалхырҭа апресс-маҵзура.
Ишәам аҳазатә шәарақәа 6 миллионк рҟынӡа инаӡоит.
"Краснодартәи атәылаҿацә атәылауаа Аԥснынтәи ЕАЕС аҵакырахь иаларгалеит амашьына ласқәа. Аҳазатә шәарақәа ҟарымҵарц азы аҳазатә усбарҭа ииашамыз адокументқәа адыргалеит, автомашьынақәа "LEXUS" ҩбеи, автомашьына "MERCEDES" жәларбжьаратәи амҩангара иазку транспорттә хархәагоуп ҳәа", - азгәалҭеит аҳазалхырҭеи ауаажәларреи реимадара аинспектор Инна Кирчева.
Нас еилкаахеит арҭ ауаа жәларбжьаартәи амҩангарақәа шымҩаԥырымгоз, атранспорттә хархәагақәа рхатә хықәкқәа рзы рхы ишадырхәоз.
Амашьынақәа рымхны аамҭалатәи аҵәахырҭаҿы иргылоуп.