АҞӘА, жьҭаара 4 – Sputnik, Бадраҟ Аҩӡба. Аԥснытәи ақәԥаҩ Инал Берзениа Шьамтәыла еизго акоманда далахәны XIX Азиатәи ахәмаррақәа рҿы дықәгылоит. Абри атәы иҳәеит аспортсмен ихаҭа Sputnik аинтервиу аҭо.
Аспорт аҿы иара раԥхьатәи ашьаҿақәа ҟаиҵеит бжьышықәса анихыҵуаз, азыҟаҵаҩ Ҭимур Џьопуа инапхгарала. 14 шықәса ихыҵаанӡа иара Аԥсны иҽазыҟаиҵон, дагьықәгылон, анаҩс диасит Санкт-Петербургҟа, уа аолимпиатә резерв Аҵараиурҭа дҭалеит.
Урыстәыла иҟазаараан аспортсмен атәыла аҩнуҵҟаиԥш анҭыҵгьы еиуеиԥшым аицлабрақәа дрылахәын. Сынтәатәи аԥхынра алагамҭаз иара Шьамтәыла еизгоу акоманда далахәны Алжир имҩаԥысуаз Арабтәи ахәмаррақәа рҟны дықәгылеит.
"Сазыҟаҵаҩ иҳәеит аҽа тәылак ахьӡала ақәгылара алшоит ҳәа. Сара сҽазыҟасҵон, аха аҵыхәтәанӡа агәра згомызт. Ус, ҽнак аҭел дысзасны исеиҳәеит атәылауҩшәҟәы хиоуп ҳәа. Агәра сымгазт адокумент афотосахьагь сзаашьҭ ҳәа иасҳәеит", – иҳәеит иара.
Иара иажәақәа рыла Шьамтәыла ахьӡала ақәгылара, имчқәа ԥишәар арегиона аҟны имҩаԥысуа аицлабрақәа, ачемпионат ҿыц рҿы иҭахын. Арахь ииасра анырра анаҭеит Урыстәыла атәылауаа жәларбжьаратәи атурнирқәа рылахәхара азин ахьыҟамгьы.
Аҵәҭаԥсара инақәыршәаны Азиатәи ахәмаррақәа рҟны Инал Берзениа жьҭаара 7 азы китаитәи аспортсмен диндаҭлоит.
"Сызцықәгылақәо еилкаахоит аиндаҭлараҿы аиааира зго ирхьырԥшны. 2016 шықәсазтәи аолимпиатә чемпион, Иран атәылауаҩ Хасан Иазданигьы ақәгыларақәа рҿы дарбоуп, афиналбжаҿы ҳаиԥылар даара исҭахуп. Исҭахуп сымчқәа ԥысшәарц", - иҳәеит иара.
23 шықәса зхыҵуа Инал Берзениа дықәгылоит 86 кьыла зыкапан ыҟоу рыбжьара Шьамтәылатәи абираҟ даҵагыланы XIX Азиатәи ахәмаррақәа рҟны.