АҞӘА, жьҭаара 3 – Sputnik, Бадраҟ Аҩӡба. Сергеи Михалков диижьҭеи 110 шықәса аҵра иазку апоетикатә еицлабра "Иахьа ахәыҷқәа, уаҵәы – ажәлар…" мҩаԥгахоит Москва Аҩны аҟны жьҭаара 14 рзы, абри атәы Sputnik иазеиҭалҳәеит акультуртә фонд "Аиашара. Аманшәалара. Аҿиара", адиректор Наталиа Бычкова.
"Алахәылацәа рзыҳәақәа ҳадаҳкылоит. Урҭ раашьҭра алшоит абри аномер +79223415988 ала шәыҽҳамаданы. Иалахәхар рылшоит 10 - 16 шықәса зхыҵуа ашколхәыҷқәа. Дара еихшахоит х-гәыԥкны: 10 - 12, 12 – 14, 14 - 16 шықәса зхыҵуа ҳәа. Гәыԥцыԥхьаӡа аӡәаӡәа алкаахоит", - лҳәеит лара.
Сергеи Михалков ахәыҷқәа рзы иҩымҭақәа зегьы ирҵоит, ирҿиара ахәшьара уадаҩуп ҳәа лҳәоит лара.
"Михалков ирҿиамҭақәа еиҵагыло абиԥарақәа рыхдырра еиҿнакаауеит, иааӡоит. Уи еиҳа заҟа заа уалаго аҟара еиӷьуп. Сгәанала арҭ рҩызцәа ауснагӡатәқәа ишалшо ала лассы-лассы имҩаԥгалатәуп", - азгәалҭеит Бычкова.
Аиндаҭлара азырхоуп алитературеи арҿиареи раларҵәара, аҟыбаҩ змоу ахәыҷқәа ралԥшаара, апатриотизм аҿар рылааӡара, аҭоурых ҳаҭыр ақәҵара. Иаиааиз иранашьахоит аҳамҭақәа, егьырҭ алахәылацәа – ирыҭахоит аофициалтә сертификатқәа.
Ауснагӡатә аҽалархәразы еиҳа инарҭбаау аинформациа аиура алшоит абра.
Аурыс хәыҷтәы литература аклассик, аҳәынҭқарратәии ауаажәларратәии усзуҩ Сергеи Михалков диит хәажәкыра 13, 1913 шықәсазы Москва, аамсҭацәа Владимир Михалкови Ольга Глебова-Михалковеи рҭаацәараҿы.