АҞӘА, жьҭаара 5 – Sputnik. Аԥсны иҿиоит альтернативатә транспорттә маҵзурақәа, урҭ азырхоуп ареспубликаҿ аԥсшьаҩцәа еиҳа-еиҳа рхыԥхьаӡара иацлаларц ҳәа иҳәеит Аслан Бжьаниа "Известия" аинтервиу аҭо.
"Аԥсны иҿиоит альтернативатә транспорттә маҵзурақәа. Арахь иаҵанакуеит аҳаирбаӷәаза. Ааигәа имҩаԥысит аиндаҭлара, далкаан аинвестор. Хара имгакәагьы апроект инақәыршәаны Аҟәа ақалақь аҿы Владислав Арӡынба ихьӡ зху аҳаирбаӷәаза аиҭашьақәыргылара иалагоит", - ҳәа иҳәеит иара.
Аҳаирбаӷәаза адагьы Урыстәылеи Аԥсни аус адырулоит аушьҭырҭатә ҭыԥ "Адлер" арҭбаара аус.
"Атуристцәа аҳәаа рахысраан еиҳа иманшәалоу аҭагылазаашьақәа рыҭаразы аусура иалаҳаргеит афымцадәыӷба "Ласточка". Адәыӷба макьаназ Гагранӡа инеиуеит, иазԥхьагәаҭоуп Аҟәанӡа инеиуа аҟаҵара. Иара убасгьы сынтәа аусура иалагеит акруизтә дәыӷба "Князь Владимир", – иҳәеит Аԥсны ахада.
Бжьаниа иазгәеиҭеит ԥхьаҟазы ишазыԥхьагәаҭоу атурбазақәа ҩба - "Южный приют" (Кәыдрытәи аиҩхаа), "Северный приют" (Ҟарачы-Черқьесиа) рыбжьара асоветаамҭатәи амаршрут аиҭашьақәыргылара. Амаршрут ареспубликахь иаднаԥхьалалоит ашьхараҿ аԥсшьара абзиабаҩцәа.