АҞӘА, жьҭаара 5 – Sputnik. Урыстәыла Арра-Мшынтә Флот аӷбақәа еснагьтәи ргыларҭа ҟалоит Очамчыра араион аҿы ҳәа иҳәеит Аслан Бжьаниа, "Известия" аинтервиу аҭо.
"Аиааиреи Ахьыԥшымреи рымш аназгәаҳҭоз ҳасқьала иадгылан аракетатә ӷба маҷ. Ҳара уи ҳаҭааит. Ҳаамҭа иақәшәо ӷбоуп. Алшарақәа дууп. Аиқәшаҳаҭра ҳнапы аҵааҩит. Хара имгакәа Урыстәыла Арра-мшынтә флот аӷбақәа иааиԥмырҟьаӡакәа ргыларҭа ҟалоит Очамчыра араион аҿы", - иҳәеит иара.
Бжьаниа иҳәеит асеиԥш аӡбамҭа ҵаҵӷәыс ишамоу Аԥсни Урыстәылеи ртәылахьчаратә мчхара. Ашәарҭадара аӡбахә далацәажәо ахада иазгәеиҭеит Қарҭ макьанагьы Аԥсни Аахыҵ Уаԥстәылеи мчыла рырхынҳәра мап шацәнамкуа, уажәтәи аԥыза-министр Иракли Гарибашвили дыпрагматикуп. Иара иаамҭазы аҭагылазаашьа аиҵаҟьара аӡәгьы иҽазишәом ҳәа. Ус шакәугьы Аԥсны иазгәарҭоит аҳауатә ҵакыра аилагарақәа америкатәи аҳаирплан-ԥшыхәгақәа рыла. Урҭ Қырҭтәыла аинтересқәа роуп ирыхьчо.
"Убри азы иҳаӡбеит асеиԥш аҟазаара. Убри аан иазгәаҳҭоит агәылеимабзиара мап шацәаҳамкуа. Уи ишырҳәо аиԥш дара рнапаҿоуп иахьыҟоу", - ҳәа иҳәеит Бжьаниа.