АҞӘА, жьҭаара 7 - Sputnik. Атәыла ахада ихаҭыԥуаҩ Бадра Гәынба диԥылеит ТАСС арегионалтә жәабжьқәа рредакциа анапхгаҩы Андреи Цицинов. Иара ҳреспубликахь дааит афотокорреспондент Андреи Соловиов имемориалтә ӷәы аартра иҽалаирхәырц.
Гәынба иазгәеиҭеит, урыстәылатәи афоторепартер Аџьынџьтәылатә еибашьраан иҭихыз афотосахьақәа шырацәоу. Ҳҭоурых ахҭысқәа аазырԥшуа арҭ афотосахьақәа рыхә шаҳараку.
"Иҭабуп ҳәа шәасҳәоит аамҭа ԥшааны Аԥсны шәахьаҭааз, насгьы ари акыр зҵазкуа хҭысуп. Ҳҭоурых иадҳәалоу ахҭысқәа ирызкуп Аԥсны Аџьыџьтәылатә еибашьраҟны игаз Аиааира 30 шықәса ахыҵра азгәаҭараз имҩаԥааго аусмҩаԥгатәқәа. Андреи Соловиов иахьатәи имемориалтә ӷәы аартрагь ҳара ҳҭоурых ауп, ҳара ҳазгәдууп ҳҭоурых", - ҳәа иҳәеит атәыла ахада ихаҭыԥуаҩ.
Андреи Соловиов Аԥсны дыргәалашәоит ҭабуп ҳәагь рҳәоит Аџьынтәылатә еибашьра ахҭысқәа раарԥшраҟны илшамҭақәа рзы. Иара Аԥсны аҭоурых аҟны даанхоит зхы иамеигӡаз, ззанааҭ иазҟазаз уаҩны ҳәа иҳәеит иара.
Андреи Цицинов атәыла аиҳабыреи ауааԥсыреи ҭабуп ҳәа реиҳәеит Андреи Соловиов ихьӡ ахьырхадмыршҭуа, Аԥсны Афырхаҵа ҳәа ахьӡ ҳаракы ахьихҵоу азы.
Бадра Гәынба асас ҳамҭас ииҭеит, аԥсуа герб зну анапхаҵа асааҭи Соловиов ифотосахьақәа згәылалаз Аџьынџьтәылатә еибашьра иазку афотоальбом "Аԥсни".