АҞӘА, жьҭаара 10 - Sputnik. Ашьаусҭҵааратә еилакы Санкт-Петербург акаҳуажәырҭаҿы еиҿкааз, арратә корреспондент Владлен Татарски дахьҭахаз атеракт азы аусҭҵаара хнаркәшеит, абри атәы аанацҳауеит РИА Новости аусбарҭа апресс-маҵзура адыррақәа шьаҭас иганы.
Аусҭҵаара ишьақәнаргылеит атеракт шазыҟаҵаз Украина аҵакыраҿы.
"Атеракт мҩаԥган ауааԥсыра рыршәаразы, арратә операциа ҷыда ахықәкқәа мап рцәыркырц, иара убасгьы Урыстәыла аҳәынҭқарратә мчрақәа русура аҳаҭыр ҵыршәаарц", - аҳәоит адырраҭараҿы.
Атеракт аиҿкааҩцәа – Украина атәылауаҩ Иури Денисови Украина инхо ажурналист Роман Попкови рганахь ала аусҭҵаара мҩаԥысуеит, иара убасгьы ашьауӷа даҵанакит Дмитри Касинцев. Иара атеракт анагӡаҩ Трепова иуадаҿы дҵәахны диман.
Арратә корреспондент Владлен Татарски (ихьӡыҵәҟьа - Максим Фомин) дҭахеит Санкт-Петербург акаҳуажәырҭа "Стрит-Бар" аҿы иҟалаз аԥжәараан. Аԥжәага Татарски ҳамҭас ирҭаз аҳаҭәараҷ иҭаҵәахын, уи Татарск илҭеит Дариа Трепова, лара даанкылоуп.