АҞӘА, жьҭаара 10 - Sputnik. Аҟәа араион Баслаҭа ақыҭан инхо Руслан Џьаноиан даанкылоуп анаркотикқәа раахәара, рымазаара, рымҩангара рзы. Абри атәы аанацҳауеит Аԥсны АдәАР апресс-маҵзура.
"Газель" аԥсҟы зкыз 40-шықәса зхыҵуаз Џьаноиан даанкылан аҳәааҿы, аушьҭырҭа-гәаҭаратә ҭыԥ "Ԥсоу" данахысуаз.
Азинхьчаҩцәа имашьынаҟны ирбеит аметадон ала иҭәыз амедицинатә гәырқәа ҩба, иара убас 10 мааҭк ақьаад ԥара илаҳәаз агашиш.
Џьаноиан иажәақәа рыла, агашиш Адлер иааихәеит.
Руслан Џьаноиан иганахь ала ашьаус хацыркуп. Гагра араион аӡбарҭа аӡбрала дырбаандаҩуп.