АҞӘА, жьҭаара 14 - Sputnik. Аԥырҩы дызҭам украинатәи ахархәагақәа ҩба ҭархоуп Амшын еиқәа ақәыԥшылара Ҟәыбан агаҿа ҳәа аанацҳауеит Урыстәыла атәылахьчара аминистрра.
"Жьҭаара 14 москватәи аамҭала асааҭ 07:10 рзеиԥш киевтәи арежим ҩаԥхьа аҽазнашәеит Урыстәылатәи Афедерациа аҵакыраҿы аԥырҩы дызҭам ахархәагақәа рыла атеррористә жәылара. Урыстәыла аҳаиртә хыхьчара ахархәагақәа аԥырҩы дызҭам ахархәагақәа ҩба ҭадырхеит Амшын еиқәа ақәыԥшылара Краснодартәи атәылаҿацә агаҿа азааигәара", - ҳәа аанацҳауеит аусбарҭа.
Ашәарҭадара аԥҵаразы Шәачатәи аҳаирбаӷәазаҿ аамҭала аԥырразы аԥкрақәа алагалан. Асааҭ 7:25 инаркны аҳаирбаӷәаза абжьааԥаны еиԥш аус ауеит.
Шәача ақалақь ахада Алексеи Копаигородски иҳәеит иҟаҵаз ажәылараан аӡәгьы ааха шимоуз, аԥхасҭа ҳәа акагь шыҟамлаз.