Урыстәыла арра-мшынтә флот аӷбақәа еснагьтәи ргыларҭа ҟалоит Очамчыра. Ас еиԥш аӡбамҭа ҵаҵӷәыс иамоуп Аԥсни Урыстәылеи ртәылахьчаратә мчхара. Европатәи Аидгыла агәҭынчымра ӷәӷәа аанарԥшит Урыстәыла Арра-мшынтә флот Аԥсны есымшатәи агыларҭа ахьыҟало азы. Иҟоуп азҵаарақәа атәыла аҩныҵҟагьы изызцәырнагаз, шьоукы ари ҳҳәынҭқарра ашәарҭадара ҭышәныртәалоит ҳәа анырԥхьаӡо, иҟоуп ашәарҭара арааигәоит ҳәа зыԥхьаӡазгьы. Арратә експерт, аинрал Закан Нанба игәаанагара иҳәеит арадио Sputnik аефир аҟны ас еиԥш афлот Аԥсны аҟазаара хәарҭас иара убас шәарҭас иаҵоу азы.
"Урыстәыла арра-мшынтә флот амчқәа уаанӡагьы ара иҟан. Уи абазаҟны ауп аҳәаахьчаҩцәа рынхарҭа ахьыҟоу иахьагьы. Излаҳахәо мамзаргьы излашәарҭоу ҳалацәажәозар, аҟама аҿы иаҩызоуп арахьгьы анахьгьы. Абаза гылазар, уи аурыс ҳәынҭқарра иазбзиоуп, иҳәаа акәшамыкәша хәыҷык инаскьаганы иҟазар. Ҳара ҳзгьы ибзиоуп, аӷбақәа аныҟала, ахәаахьчаҩцәагьы акәыршаны идыргылароуп. Ҳгәылацәа еибашьрак иалагозар, аԥхьа излалаго аҳауа аҟынтәи ааха алоуп. Излашәарҭоу ҳәа уҵаауазар, уи Еиду Америкатәи аштатқәеи НАТО атәылақәеи Урыстәылеи реизыҟазаашьақәа еиҿкаам. Аибашьра иалагозар, урҭ аурыс ибазақәа ахьыҟазаалакгьы амца ажәарымҵар ада ԥсыхәа ыҟам. Ус анакәха, ҳадгьылҵакыра ус еиԥш амчымхара иақәшәар ҟалоит. Ҳара ҳақәгәыӷуеит ҳастратегиатә ҩыза Урыстәылеи НАТО атәылақәеи иаартны еиҿамгылап ҳәа даҽа дгьылк аҟны. Иашоуп, ус еиԥш аиҿагылара Украина иҟоуп", - иҳәеит Нанба.
Аицәажәара инеиҵыхны ишәаҳар шәылшоит аудиофаил аҟны хыхь.