АҞӘА, жьҭаара 20 – Sputnik. Андреи Стенин ихьӡ зху Жәларбжьаратәи аицлабраҿ Гран-при агеит ажурналист Алексеи Орлов иҭыхымҭа еиқәаҵәа-шкәакәоу афотосахьа "Зарево".
"Зарево" ари арепортаж Донецки Мариуполи рыхҭысқәа аанарԥшуеит. Иара ҭыхын Украина арратә операциа ҷыда ианалага ашьҭахь мызк мҵыцкәан.
"Иҟалап арҭ амшқәа сыԥсҭазаараҿы зегь реиҳа иуадаҩу мшызар, избанзар сара избеит Донецки Мариуполи арыцҳара зхызгоз ауаа. Сара хықәкыс исымаз зҭынчԥсҭазаара нҵәаз, иааидкыланы ақалақь хаҿыкны арбара. Иаланхо ауаа рыбзазареи рдоуҳатә беиареи рҽеиҭаркит, ирацәаҩуп ирымаз-ирыхӡыз зцәыӡыз, иҟоуп згәакьацәагьы ари аамҭа изцәалаӡыз. Иҟоуп, агәыӷра ада акгьы ззанымхазгьы", – иҳәоит Орлов иусумҭа дахцәажәо.
"Россия сегодня" адиректор хада Дмитри Киселиов иазгәеиҭеит аицлабра хыҵхырҭас ишамоу Андреи Стенин иҭахара. 2023 шықәсазы дҭахоит аҽа корреспонденткгьы, авоенкор Ростислав Журавлиов.
"Ари азанааҭ асеиԥш иҟоу ашәарҭарақәа ацуп. Уажәтәи аицлабраҿ уаанӡа аасҭагьы аибашьрақәа рацәаӡахеит. Иҟалап ари адунеи ахы ахьхо аанарԥшуазар", - ҳәа иҳәеит Киселиов.
Иара иҳәеит афотосахьа ҳаамҭазтәи адунеи асахьаркыратә хаҿы шаанарԥшуа, уи инадҳәаланы ахәаԥшҩы еиҳа аҭагылазаашьа шиныруа. Иара убасгьы иазгәеиҭеит, Стенин ихьӡ зху аиубилеитә еицлабраҿ ҿыцрак ишазԥшу.
Амедиагәыԥ "Россия сегодня" афотокорреспондент Андреи Стенин дҭахеит нанҳәа 6 2014 шықәсазы Донецк. Иара дызқәтәаз амашьына еишьҭагылан инеиуаз ирылан, украинатәи аибашьцәа рхымца иақәшәеит.
Жәларбжьаратәи аинформациатә маҵзура "Россия сегодня" еиҿнакааз Андреи Стенин ихьӡ зху жәларбжьаратәи афотожурналистика аконкурс хықәкыс иамоуп аҿар адгылара рыҭареи ауаажәларра ҳаамҭазтәи афотожурналистика ахықәкы разхьарԥшреи.
Есышықәса уи иалахәхо атәылақәа рхыԥхьаӡа иацлоит. Сынтәа ажиури алахәылацәа ирыхәаԥшит 50 тәыла рҟынтәи иаарышьҭыз х-нызқь рҟынӡа афотосахьақәа. Урҭ рыбжьара раԥхьаӡа акәны Бурунди, Бахреин, Босниеи Герцеговинеи рҟынтәи аусумҭақәа нарышьҭит.
Аицлабра Жәларбжьаратәи аинформациатә дгылара арҭоит: аинформациатә маҵзуреи арадиои Sputnik, RT ателеканали апортали, амедиахолдинг Independent Media (ЮАР), ажәабжьтә маҵзура ANA (ЮАР), Shanghai United Media Group (SUMG) (Китай), агазеҭ China Daily (Китаи) аинтернет-портал, аинтернет-портал The Paper (Китаи), амедиаҳа Al Mayadeen (Ливан).