АҞӘА, жьҭаара 20 – Sputnik. Аԥсны атранспорттә инфраструктура аҿиара иалацәажәеит Москва Аԥсны аԥыза-министр ихаҭыԥуаҩ, аекономика аминистр Кристина Озгани Урыстәыла атранспорт аминистр ихаҭыԥуаҩ Игор Чалики ҳәа аанацҳауеит Аԥсны аекономика аминистрра апресс-маҵзура.
Аиԥылараҿы ирылацәажәан амшынтә, автомабилтә, аихамҩатә еимадарақәа рызҵаара.
Ҷыдала иазхьаԥшын аидареи апассаџьыри еихамҩала рымҩангара аизҳара. Иахцәажәан Гагранӡа аныҟәара иалагаз афымцадәыӷба "Ласточка", уи ахырхарҭа ацҵара азгәаҭоуп 2025 шықәсазы.
Аганқәа иара убасгьы ирылацәажәеит амшынтә мҩангарақәа, аушьҭырҭатә ҭыԥ "Ԥсоу" аҿы аушьҭратә лшара арҭбаара, агәаҭаратә цәаҳәақәа рыцҵара, ахархәара змам ацҳа аиҭашьақәыргылара.