АҞӘА, жьҭаара 21 - Sputnik. Аԥсны Аҳәынҭқарратә ҳазалхратә еилакы ахаҭарнакцәеи, Урыстәыла Афедералтә ҳазалхырҭа ахаҭарнакцәеи русеицура аизырҳаразы еилацәажәеит Аҟәа. Абри атәы аанацҳауеит Аԥсны Аҳәынҭқарратә ҳазалхратә еилакы апресс-маҵзура.
Аԥснытәи аган напхгара аиҭон Аԥсны Аҳәынҭқарратә ҳазалхратә еилакы аиҳабы ихаҭыԥуаҩ Зураб Ашәба, урыстәылатәи - Краснодартәи аҳазалхратә еилакы ахада Наталиа Полосухина.
Рыҩтәылак рҳазалхратә усбарҭақәа рхаҭарнакцәа 2023 шықәса акурорттә аамҭа алҵшәақәа ирзааҭгылеит, иара убас ацитрустә шәырқәа аҳәаа ахыгаразы иҟаҵатәу азҵаарақәа ирылацәажәеит.
Аԥсуа-аурыс ҳәааҟны акомпиутортә система аусура анеиԥҟьалакгьы адырра иаразнак иҟарҵаларц, амашьынақәа рхыԥхьаӡаразы адыррақәа аарышьҭларц, аекскурсиа мҩаԥызго амашьынақәа аҳәааҟны рышәҟәҭагалара ирласны имҩаԥысларц уҳәа азҵаарақәа жәпакы ирылацәажәеит Аԥсни Урыстәылеи рҳазалхратә усбарҭақәа рхаҭарнакцәа.