АҞӘА, жьҭаара 23 – Sputnik. Израиль атәылахьчара ар (ЦАХАЛ) хышә инареиҳаны Газа аобиектқәа ирылахысит ҳәа аанацҳауеит РИА Новости, ар рпресс-маҵзура адыррақәа шьаҭас иганы.
Иазгәаҭоуп, изеихсыз рыбжьара ишыҟоу адгьылаҵатә туннельқәа, акомандатәи ахылаԥшратәи ҭыԥқәа, арратә операциа иалагарц згәы иҭоу амчқәа рзы ашәарҭара зҵоу егьырҭ аобиектқәа.
Уаанӡа ЦАХАЛ апресс-маӡаныҟәгаҩ Џьон Конрикус аҳәамҭа ҟаиҵахьан асектор Газа аҿы адгьылтәи аоперациа ҟалом ХАМАС аибашьцәа рыҽрырҭаны 212-ҩык атҟәацәагьы рырҭар.
Асабша, жьҭаара 7, ашьыжь Израиль асектор Газа аганахьала аракетақәа рыла зеиԥш ҟамлацкәа иажәлеит, уи ашьҭахь ХАМАС аибашьцәа атәыла аҳәаа иаԥну араионқәа ирылалеит, ауаа рацәаҩны итҟәаны иргеит. Уи аҭакс ЦАХАЛ аоперациа "Аихатәы аҳәақәа" ("Железные мечи") иалагеит.
Израильтәи аруаа аҳәаа иаԥну аиланхарҭақәа зегьы хылаԥшра рырҭо иалагеит, анклавгьы ракетала иажәлеит. Иара убасгьы ЦАХАЛ аҳәамҭа ҟанаҵеит асектор амацәаз ишҭаркуа, аӡы, афымцалашара, ахәшәқәа, афатә рыҭара шааныркыло.
Аиҿагылара ахы еиҭацәырнагеижьҭеи асектор Газа аҿы иҭахахьеит 4,6 нызқьҩык ауааԥсыра, 14 нызқьҩык ахәрақәа роуит, Израиль аганахьала иҭахеит 1,3-ҩык, 20 урыстәылаа налаҵаны.