АҞӘА, жьҭаара 25 – Sputnik, Бадри Есиава. Аклуб "Аԥсны" акоманда "Ростов-Волей" иаиааит анапылампыл азы Урыстәыла ачемпионат аҩбатәи атур аҿы ҳәа Sputnik иазеиҭеиҳәеит аԥснытәи акоманда азыҟаҵаҩ Зураб Маргиа.
Аҩнтәи ахәмаррақәа мҩаԥысуан Гәдоуҭа ахәыҷы-қәыԥштә спорт школ ахыбраҿы. Воронежтәи акоманда ацхәмарраан аԥснытәи аспортсменцәа аҵахеит, аха Ростов-на-Дону акоманда ианрыцыхәмаруаз 3:2 ҳәа иаиааит.
"Ачемпионат хәажәкырамзанӡа имҩаԥысуеит. 11 команда алахәуп. Ԥшьынтә-ԥшьынтә еицыхәмартәуп. Иаиааиз алкаахоит ироуз акәаталақәа ирхьырԥшны. Ҳара ԥшь-кәаталак ҳамоуп. Ҳара раԥхьаӡа акәны Урыстәыла ачемпионат ҳалахәхеит", – иҳәеит иара.
Азыҟаҵаҩ иажәақәа рыла, раԥхьаҟа ирзыԥшуп ачемпионат ахԥатәи атур. Абҵарамза алагамҭазы "Аԥсны" Краснодари Маиҟәаԥи ркомандақәа ирындаҭлоит Белореченск ақалақь аҿы. Анаҩс аԥснытәи аспортсменцәа Тиуменҟа амҩа иқәлоит. Ԥхынҷкәынмзазы Аԥсны ирыдыркылоит Иванови Обнински ркомандақәа.
Маргиа иҳәеит, аԥснытәи акоманда Урыстәыла ачемпионат алахәхара шалыршахаз аҩ-тәылак анапылампыл азы Рфедерациақәа рыбжьара аусеицуразы аиқәшаҳаҭра иалҵшәаны.