АҞӘА, жьҭаара 27 – Sputnik, Асмаҭ Ҵәыџьԥҳа. Арт-пленер "Ҭагалан аԥшшәхәқәа" алахәылацәа рцәыргақәҵа аатит Ацәыргақәҵатә зал хадаҿы Аҟәа.
Аусмҩаԥгатә иалахәын Аԥсны, Нхыҵ Кавказ ареспубликақәа, Санкт-Петербург, Москва рҟынтәи асахьаҭыхыҩцәа.
Ацәыргақәҵатә зал хада адиректор Ельвира Арсалиаԥҳа иазгәалҭеит, арт-пленер ари еиуеиԥшым ақалақьқәа рҟынтәи арҿиара знапы алаку ауаа реибадырра, русеицура, рԥышәа аимдара ишазырхоу.
"Ҳәарада, Аԥсны апленер иаҭааз асахьаҭыхыҩцәа рырҿиараҿы аҭыԥ ду ааннакылоит. Агәра згоит ҳкультуратә еимадарақәа ԥхьаҟа иҵегьы аҿиара шроуа", - лҳәеит лара.
Жәларбжьаратәи асахьаҭыхыҩцәа реидгыла "Аԥсны-арт" ахантәаҩы Нугзар Логәуа иазгәеиҭеит, апроект алахәылацәа аус ду шыҟарҵаз, апленер ауаа бзиа ишеицырбаз.
Ауснагӡатә аиҿкаара иадгылеит Москва Аҩны. Иара адиректор Александр Бигәаа игәаанагарала апленер Аԥсны азы ихҭыс дууп.
"Асеиԥштәи ауснагӡатәқәа акыр рыҵаркуеит асахьаҭыхыҩцәа хатәрақәа рзы аиԥш аҿарацәа рызгьы", - иҳәеит иара.
Сынтәа аҳасабырбатә цәыргақәҵахь инаган 70 усумҭа, уа иарбан аӡиа Риҵа, Афон ҿыц, Аҟәа, Кындыӷтәи абаа Сан-Томазо, Аҟәатәи аԥшаҳәа. Апленер аҳәаақәа ирҭагӡаны имҩаԥган аҟазаратә-классқәа. Урҭ руак мҩаԥигеит раԥхьаӡа акәны Аԥсныҟа иааз Санкт-Петербургтәи асахьаҭыхҩы Анатоли Аненков.
"Сара сзы ара зегь ҿыцуп. Иҿыцуп аԥшшәхәқәа, ацәаныррақәа. Абыржәыҵәҟьа ашьхарантә сылбааит. Даара исгәаԥхеит", - иҳәеит иара.
Асахьаҭыхҩы Ольга Тумакова илҳәеит арт-пленер лара лзы аԥышәеимдара адагьы аенергетикаеимдара шакәыз.
Москвантәи иааз афешн-иллиустратор Лида Чугунова илҳәеит Аԥсныҟа аиҭахынҳәра шылҭаху.
"Сгәы иҭашыз абзиабара сусумҭақәа ирныԥшит. Уи зегьы ижәбар шәылшоит", - лҳәеит лара.
Арт-пленер "Ҭагалан аԥшшәхәқәа" еицеиҿыркааит еидҵоу ихьԥшым асахьаҭыхҩцәа "Аԥсны-арт" рхеилаки, Аԥснытәи аҳәынҭқарратә университети, Москва аиҳабыреи, Аҟәа иҟоу "Москва аҩни".