АҞӘА, жьҭаара 28 – Sputnik. Аԥсны аиҳабыреи аинвестор ООО "Инфраструктурное Развитие" Аҟәатәи аҳаирбаӷәаза аиҭашьақәыргыларазы аиқәшаҳаҭра рнапы аҵарҩит.
Аинвестициатә шәҟәқәа иазгәанаҭоит аҳаирбаӷәаза "Аҟәа" акомплекс зегьы аиҭашьақәыргылара.
Аиқәшаҳаҭраҟны иарбоуп:
ахархәаразы еибгоу аеродром ахәҭа аиҭашьақәыргылара,
зоура 3 100 метреи зыҭбаара 45 метреи иҟоу ашьҭыԥраара-атәаратә цәаҳәа арҽеира,
ашьҭыԥраара-атәаратә цәаҳәаҟны идыргылоит иҷыдоу амаругақәа, урҭ аҳаирпланқәа маншәаланы ртәара алдыршоит,
аҳаирпланқәа рыргыларҭа аҵакыра ҿыц еиҿыркаауеит,
аиқәырхаратәи, ацрыҵцарҭақәеи, аҳаирпланқәа рбылтәыҭаҭәарҭақәеи рыргылара,
апассаџьырцәа рзы атерминал ҿыц аргылара, иара убас аҳаирбаӷәаза аҭоурыхтә хыбра аиҭарҿыцра.
Ирҿыцхо аҳаирбаӷәаза "Аҟәа" сааҭк ала 1 300-ҩык апассаџьырцәа адкылара алшоит.
Иара убас аҳаирбаӷәаза аусура ашьақәыргылара иадҳәалоу аргыларақәа - атерминалқәа, былтәыла-аиқәыршәаратә комплексқәа ргылахоит.
"Иахьа знапы зҵаҩҩу аҳәынҭқарра-хаҭалатә партниорразы Аиқәшаҳаҭра иазгәанаҭоит аҳаирбаӷәаза аусура алагаразы аҿҳәара, аԥҟарақәа, аԥаразоужьра ахышәаҵышәа. Аҳәынҭқарратә хатәраҿы ишыҟац иаанхоит аеродром, аеродром иатәу ахыбрақәа, аҳаирбаӷәаза аҭоурыхтә хыбра, иара убас аҳаирбаӷәаза ахьӡ "В. Арӡынба ихьӡ зху Жәларбжьаратәи Аҟәатәи аҳаирбаӷәаза"", - лҳәеит аԥыза-министр ихаҭыԥуаҩ, аекономика аминистр Кристина Озган.
Урыстәылатәи аԥсшьаҩцәа Аԥснытәи акурортқәа рахь иаадырԥшуа аинтерес еизҳауеит иҳәеит ахеилак "Инфраструктурное развитие" ахантәаҩы Рашид Нургалиев.
Аилахәыра адиректор хада Сергеи Грибков иажәақәа рыла, зеиԥш ыҟам аҳаирбаӷәазатә комплекс аиҭашьақәыргылара рнапы иануп.
Урыстәыла аекономикатә ҿиара аминистрреи Аԥсны аекономика аминистрреи аинвесторцәа рыбжьара еиҿыркааз аицлабраҟны аиааира агеит ахеилак "Инфраструктурное Развитие".
Аиқәшаҳаҭра анапаҵыҩра далахәын Аԥсны ахада Аслан Бжьаниа. Уи уажәаԥхьа иҳәахьан Владислав Арӡынба ихьӡ зху Аҟәатәи аҳаирбаӷәаза аусура иалагоит 2024 шықәса ԥхынҷкәын 24 рзы, жәларбжьаратәи арратә ҭагылазаашьа еицәамхар ҳәа.