АҞӘА, абҵара 1 - Sputnik. Аусеицураз аиқәшаҳаҭра рнапы аҵарҩит Урыстәыла аҩнуҵҟатәи аусқәа русбарҭақәа рветеранцәа Краснодартәи ррегионалтә уаажәларратә еиҿкаара ахеилаки Аԥсны АҩАР русбарҭақәа рветеранцәа руаажәларратә еиҿкаареи.
Аветеранцәа рԥылараан Аԥсны аҩнуҵҟатәи аусқәа рминистр Роберт Кьиут иазгәеиҭеит ҩ-ҳәынҭқаррак рзинхьчаратә усбарҭақәа реизыҟазаашьа аҿиара бзиа шамоу. Иара еиҭеиҳәеит аоперативтә, акриминалисттә, азинтә информациа уҳәа, аимдара аусхк аҿы аҿиара шыҟоу.
Аветеранцәа ареспубликахь иааит ҩ-ганктәи аизыҟазаашьақәа рырҭбаареи рырӷәӷәареи хықәкыс иҟаҵаны.