АҞӘА, абҵара 2 - Sputnik, Асмаҭ Ҵәыџьԥҳа. Аԥсны Апарламент аҳазалхратә закәанеидкыла аусура алагаразы азин ҟанаҵеит.
Апроект адокумент иҳәаақәнаҵоит атауарқәеи атранспорттә хархәагақәеи Аԥсны аҳазатәҳәаа ахысра иадҳәало аҭагылазаашьақәа, урҭ ашәҟәы рҭагалареи роушьҭреи, иара убасгьы хаз иго тауарқәак ркатегориақәак- ахазхархәара змоу, жәларбжьаратәи аԥошьҭатә шьҭымҭақәа, жәларбжьаратәи аидарамҩангараз атранспорт рганахь ала аҳазалхратә операциақәа рымҩаԥгара аԥҟарақәа.
Иара убасгьы аҳазалхратә закәанеидкыла иҳәаақәнаҵоит аҳазалхратә усхк аҟны аҳазалхратә усбараҭқәа, амҩангаҩцәа, аамҭалатәи аҵәахырҭақәа рыԥшәмацәа, аҳазылхратә шьҭаҵарҭақәа, иҭацәу ашьҭаҵарҭақәеи баџьда ахәаахәҭразы адәқьанқәеи, иҳәаақәнаҵоит Аԥсны аҳазалхратә усбарҭақәа реилазаареи, амаҵзурауаа рыстатус уҳәа убас егьырҭгьы.
Зынӡа адокумент шьақәгылоуп 10 ҟәшаки 488 хәҭаҷи рыла. Иара иазыԥхьагәанаҭоит аҳазалхратә операциақәа раан аинформациатә технологиақәа реишьашәалара, уи иабзоураны имаҷхоит адәныҟаекономикатә ус знапы алакәу раамҭеи рныхрақәеи.